موال...بقلم خضر الفقهاء...مجلة كلام من القلب

موال ... بلهجــة بـلاد الشــام
..........
طَــلَّ الـصُّبُـح وتبـسَّمتْ صَـوب السَّما الـتَّلّات
و تفرهدت فوق السهل في سريرها النسمات
خيط الشَّمِس مَـرّ بهَمِس ينهــر على العتمــات
وحـدي بأحلام الأمِس ،، و كفُوف سلبتني بلَـمِس
عــم غَنّـي مـوال الهـــوى و ارسُــم لهــا حكــايات
-------------
أغــنيــة ( قلبي انسلب ) ..
.............
رقة بجمال و خجلْ ،، و الخطوة كرجةْ حجلْ
ع شفافهــا مــوال ،، و بــعيــونهــا ضحكــة

سَلبتْ هَنـا نـومي ،، حِليَتْ بهـا همــومي
يـا إمّي - مهضومةْ ،، تِـهنــا بــهـا الـشِّركِةْ
قلبي معاها صــار ،، لمّـا ابـتــدا الـمشـوار
شو لَـزمِتُـه نحـتار ،، و أيـديــنا مِـشتـبـكـةْ
ردّي الهوى ردّيـه ،، قلـبي معـاكِ شاريــهْ
و الـوِدّ لا تنـسيه ،، راس مالي و الـتِّـركِـهْ
هنّـيني بوجودك ،، بــالــــورد بــخـدودك
ميلي و نَدِي عودِك ،، يشبكني للدبـكة
بنت الأصل و زمـام ،، سلطانـة الأحلام
تهمس بهَدْل يمام ،، و بتحكي مِلتِبكـهْ
يــا إمّي شـوفيهـا ،، قلبي إنفتن فيهـا
زوري حنـانيــها ،، تــا نـحكي بـالشَّبكهْ


بقلم خضر الفقهاء ----