هذه الكلمات تحكي الصورة المؤسفة عن حال الهجرة غير الشرعية التي اوجعت قلوبنا حزنا
مع السلامه يا أما
🙋🙋ه🙋🙋
مع السلامه يا أما
أنا مهاجر هجره غير شرعيه
على سفينه صغيره
محشورفيها البشر ومصديه
ايوه بقولك مع السلامه
و اخترت طريق الندامة
يا وطن نهب خيرك الحراميه
كنت عارف إني ممكن
أموت غرقان
وفاكر نفسي هودع الحرمان
لكن يا خساره الغرق مصيري
وما ليش عندك أي ديه
لا وكمان معايا مراتي وولادي
أحفادك يا غاليه ساميه وهنادي
والمركب انقلب في قلب المايه
ايوه هقول كلام يبكي الحجر
أطفال بتغرق في لمح البصر
والذنب ذنبي والقلب اتكسر
وآخرتها أنا آسف البحر غدر
أصل الحكايه يا أما حكم القدر
يا ترى يا أمي مين المسؤل
ضيق الحال
و لا طبق الفول
و لا عدم الرضا
و الغنى المأمول
رميت نفسي في الهلاك
و بقول النصيب معقول
و كنت مفكر إني هسافر
و اشتغل هناك واعافر
حسبت نفسي واد شملول
آه يا ولدي قلبي بيبكي عليك
كان نفسي ما أودعك
وأبوس إيديك
تركتني مجروحه
وبظروفي مدبوحه
والطمع ملى عنيك
فاكر يا ولدي ربنا يهديك
كنت بدعي ربنا يحميك
شربت من نيلي
و قلت لي شيلي
و شلت الهم من على كتفيك
ليه يا ولدي بكيت عيوني
و وجعت قلبي
و حبايبي هجروني
أحكي إيه لولادي لو سألوني
أقولهم هاجر في البحر
علشان يوبخوني
ولا أقولهم مات هو
ومراته وولاده
وف بحر الحزن غرقوني...
مع السلامه يا أما
رايح أموت في هجره منسيه
مع السلامه يا أما يا نور عنيه
😢😢😢😢😢😢😢😢😢😢😢😢😢😢😢😢😢😢😢😢😢😢
بقلم الكاتب سامح محمد حسن حراز
😢😢😢😢😢😢😢😢😢😢😢😢😢😢😢😢😢😢😢😢😢😢
ليست هناك تعليقات:
إرسال تعليق