هي إختزال العمر كله
ف ليلة بادئة بضحكها
حُلت أساور من وطن علي صدرها
أشمل معاني "الصفصفة "
دايما يغيبوا وتبقي هي "المصطفى"
منخل حبايبه يهزه فينزهم
يتبقي نورها وعمره يوم ما انطفى
ـــــــــــــ
فـ حضنها فُرض الكسل
وفـ حسنها هزُل الغزل
شِعري اللي غطي وصار مثل
فـ حرمها يصبح مبتذل
لو يوم راودني بوصفها
يكفي اني اقول عنها انها
مصدر رئيسي للعسل
سوي الإله من حضنها
برداََ .. شراباََ .. مُغتسل
ومزيج بكاها ومرها
ولا مره مرر طعمها
فضلت عسل
ــــــــــــــــ
أكسجيني مصادره أنفاسها
أرضي عاشقة الخبط من فاسها
مستحيل اسرح ف يوم ف اسهى
عن نفسها وهو سر الروح
قلبي متفصل علي مقاسها
تاجي نقى مكانه فوق راسها
حتي لو لخبطت من كاسها
عمري يوم ما باروح
ــــــــــــــــــــ
كان يومها صيف
لابس خفيف والجو شتّى
وعييت ببرد من النضيف
ورماني جته
فكشفت واستعجبت لما لقيت
دكتوري كاتب اسمها
جوه الروشته !!
*تلات* حروف قادرين
يشفوك بأمر الله
ولو اني كاره للدوا
دوا "هي" يا محلاه
ــــــــــــــ
برائتها دايماً سر قوتها
لو جيت ف يوم وسألتها
نفسك ف إيه لو كنتي يوم جنبي ؟!
أقصي طموحها يكون
غزل البنات بمبي
ــــــــــــــــ
وجه ابتسامتها البسيطة مالوش
علي وجه البسيطة شبيه
ورغم ذلك
أول ما بيبان ثغرها
بإيديها بتخبيه
يحصل كسوف كُلي
فجأة بدون تنبيه
ويادوب مفيش
الشمس تقلب قمر
ــــــــــــــــــــ
على طول
أول ما اشوفها بقول
"مستعصي ليه الشعر فيكي
يا ملكة الحلوين"
يفرق فـ إيه حور الجنان
ف الشكل كان
سيان أو التكوين
طب ما انتي برده بـ طلتك
بتخلي عين الشمس غين
وبيكاسو راهن علي نوبل
أول ما تكمل رسمتك
واهو عاش ومات
ومكفهوش
العمر للتلوين
لونك مالوش مالكه
وخليط لمليون لون
لونك بلون الكون
ولا انس كان ما يكون
يقدر يجمَّعهم !!
#خالد_عاطف
ليست هناك تعليقات:
إرسال تعليق