وين الوعي ،، - للشاعر / خضر الفقهاء

وين الوعي ؟؟!!
.............

عنا الوعي تخَلّى و غابْ
و ما زلنا بنسف الترابْ
إعلام مُشتَرى و كذاب
و زور و إفك صاروا خطاب
و مضمار الحق مخاصمنا
و عن أهلنا صرنا اغراب
بنصيح و نشمخ و ننادي
بعزم أسود و فعل كلاب
باعونا و شاركنا بغفلة
و سدوا ع الفهم الأبواب
و تشحططنا و تمرمرنا
نطلع من دلف لـ مزراب
و منا البعض اللي ما يساوم
معتقل و منفي و بـ عذاب
صرنا سلاح العادي و أمنه
و صرنا بأمره ضروس و ناب
و لســا بنهتف بالحريّة
يرحم ستك - مالها اصحاب
حريتنا بذمة زمرة
حِدّاية انصاعت لـغُراب
لا تَوهِّمنا بجيش و همّة
مخصيّة من غير إنجاب
خلّونا نعرف قصتنا
من بابها حتى المحراب
و نشوف الشمس من المنخل
ما نصدق واهم إن عاب
و ما نرضى بسراب و خدعة
و نتحاكم بشريعة غاب
بدنا نحقق واقع أفضل
لازم بقلوب و بحراب
مش ممكن بحبال الغازي
و قانون الحاوي و جراب
يا رايــد آمــال تشـتّي
زوّد غيمات بكـــتاب
من غُلبي مجروح و ببكي
عمري فات بهيك بواب
و للخلف بإصرار بنرجع
واستسلمنا و كل شي ساب
و العادي ع التل تربع
أما عمر كفاحي خاب
--- خضر الفقهاء ---