قالت ٱكتبلي سطر ع الدفتر... بقلم مالك سرحال

قالت ٱكتبلي سطر ع الدفتر))

قالت ٱكتبلي سطر ع الدفتر
ت بغيبتك اقعد واتذكر
وتبقى بقلبي ودفتر التذكار
لو صار بيني وبينك المهجر

يا رفيقتي شو بتنفع الاشعار
لما لهيب القلب يتفجر
نوار عم يذبل بلا نوار
وعصفور عم ينطر جنى البيدر
مر الشتي ما خوفو الاعصار
اول ربيعو جانحو تكسر
يا وردة اللضحكت بقلب الدار
فوح شذاها وعطرها تبخر
يا نحلة اللبتجن بالازهار
مجنون مثلك ع طبق احمر
وللقلب قلتلو بهالمشوار
بدي قصيدة من البحر اكبر
قلي تأنى شو جرى شو صار
يا شاعر الاحزان وتصبر
ما بتسكرك خمرة ولا انت خمار
صاير ع همسة حب عم تسكر
ليك القمر حدو نجوم كثار
بعطيك نجمة دمها فور
لا لا لا ما بدي . هالحلول صغار
بدي الي دمي ودمها تقطر
بدي هدية عطرها فوار
توصل لقلب من الثلج اطهر
ولعيون جن الحزن فيها ثار
خايف عليها تذبل وتصفر
من شان قلبي يا صلى الاوتار
تتلامسي الكلمات مش اكثر
خايف على شفافك لهيب النار
يحرق شذاها انباست الدفتر

بقلم مالك سرحال